မြို့တော်ခန်းမ အနီးတွင် ဗုံးတစ်လုံးတွေ့ရှိ

ရန်ကုန်မြို့၏ လုံခြုံရေးအတင်းကြပ်ဆုံးနေရာများတွင် တခုအပါအဝင်ဖြစ်သည့် မြို့တော်ခန်းမ ပရဝုဏ်အတွင်း ခန်းမအဆောက်အအုံရှေ့ မဟာဗန္ဓုလပန်းခြံဘက်အခြမ်း ဆင်ဝင်အောက်တွင် တနင်္ဂနွေနေ့ ညနေပိုင်းက ဗုံးတလုံးတွေ့ရှိခဲ့သည်။

ဗုံးဖြစ်ကြောင်း စစ်ဆေးတွေ့ရှိပြီးနောက် ညနေ ၆ နာရီ ဝန်းကျင်ခန့်တွင် မြို့တော်ခန်းမရှေ့ မဟာဗန္ဓုလ လမ်းမကြီးကို ဆူးလေဘုရားထောင့်မှ စတင်၍ ယာဉ်သွားလာခွင့် ရပ်ဆိုင်းပြီး ယူနီဖောင်းဝတ် ရဲများက နေရာယူ ပိတ်ဆို့ထားခဲ့သည်။

ဗုံးတွေ့ရှိသည့် သတင်းနှင့် လမ်းပိတ်ဆို့ထားသည့် သတင်းကြောင့် သွားရောက်သတင်းယူသည့်
ပြည်တွင်းဂျာနယ်များမှ သတင်းသမားများကို ရဲအရာရှိအချို့က ဓါတ်ပုံရိုက်ကူးခွင့် တားမြစ်ခဲ့ကြောင်း သိရသည်။“ဓါတ်ပုံမရိုက်ဖို့ လာပြောတယ်။ လုံခြုံရေးကိစ္စဖြစ်လို့ နားလည်ပေးဖို့ ဘာညာ ကောင်းကောင်းမွန်မွန်ပြောတာပါ။ နောက်ပိုင်းသတင်းထောက်တွေ တော်တော်လေးများလာတော့ အုပ်စုလိုက် ခပ်လှမ်းလှမ်းက ဓါတ်ပုံရိုက်တော့ လာမပြောတော့ဘူး။ ”ဟု ပြည်တွင်းဂျာနယ် သတင်းထောက် တဦးက ပြောသည်။

ဗုံးတွေ့ရှိသည့် နေရာသည် သီးသန့် ယာဉ်ရပ်နားခွင့် ကတ်ထုတ်ပေးထားသည့် အရေးကြီးပုဂ္ဂိုလ်များ၏ ယာဉ်ရပ်နားရာ နေရာအနီး ဖြစ်ပြီး ယူနီဖောင်းဝတ်ရဲများ အမြဲတစေ စောင့်ကြပ်နေသည့် နေရာဖြစ်သည်။


သီးခြား တရားဝင် အတည်ပြုချက် မရသော်လည်း အခင်းဖြစ်ပွားရာသို့ ရောက်ရှိနေသည့် သတင်းထောက်များ၏ ပြောဆိုချက်အရ အဆိုပါဗုံးအား ဖောက်ခွဲရှင်းလင်းပစ်ခဲ့သည်ဟု သိရသည်။
“ ၇ နာရီ ၅ မိနစ်လောက်မှာ “ဘုန်း” ဆိုပြီး အဲ့ဒီနေရာကပဲ အသံထွက်လာတယ်။ စောင့်နေတဲ့ လူတွေကော ရဲတွေကော အားလုံးဝိုင်းကြည့်ကြတယ်။ အထဲနဲ့ အဆက်အသွယ်ရှိတဲ့ တယောက်က လှမ်းမေးတော့ ဗုံးကို ဖောက်ခွဲပစ်မှ ရမှာမို့ ခွဲပစ်လိုက်ရတယ်ပြောတယ်။ အသံက တော်တော်လေးတော့ ကျယ်တယ်။ အဲ့အသံကြားပြီး သိပ်မကြာဘူး မြို့တော်ဝန်လဲ ပြန်သွားပြီလို့ သိရတယ်။” ဟု သွားရောက် သတင်းယူခဲ့သူ သတင်းထောက်က ဆိုသည်။
ရန်ကုန်မြို့တော် စည်ပင်သာယာရေး ကော်မတီရုံး အခြေစိုက်ရာ မြို့တော်ခန်းမအတွင်းသို့ ကိစ္စအသီးသီးဖြင့် ဝင်ရောက်မည့်သူများအနေဖြင့် မှတ်ပုံတင် (သို့) အထောက်အထားကတ်တခု ပြသရန်လိုပြီး အမျိုးသမီးလက်ကိုင်အိတ်အပါအဝင် မည်သည့် အိတ်မျိုးမှ ယူဆောင်ခွင့် မရှိသလို ရှာဖွေရေးစက်များကိုလဲ
ဖြတ်သန်းရသည်။
နောက်ဆက်တွဲ ထပ်မံကြားသိရသည့် သတင်းများအရ ည ၉ နာရီ ၁၂ မိနစ်အချိန်တွင် မြို့တော်ခန်းမအနီးမှ ကျယ်လောင်သည့် ပေါက်ကွဲသံတခု ထပ်မံထွက်ပေါ်လာကြောင်း သိရပြီး မဟာဗန္ဓုလ လမ်းမအား ပိတ်ပင်ထားဆဲ ဖြစ်ကြောင်း သိရသည်။

ဒေါ်အောင်ဆန်းစုကြည်နဲ့ အင်ဒိုနီးရှားနိုင်ငံခြားရေဝန်ကြီးတွေ့ဆုံ

ဒေါ်အောင်ဆန်ုးစုကြည်နဲ့ ဦးအောင်ကြည် ထပ်မံတွေ့ဆုံ

မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ဟာ မြန်မာအစိုးရ၀န်ကြီး ဦးအောင်ကြည်နဲ့ ဒီကနေ့ နေ့လည်ပိုင်းက ရန်ကုန်မြို့၊ စိမ်းလဲ့ကန်သာဧည့်ဂေဟာမှာ တစ်နာရီ နီးပါးကြာ တွေ့ဆုံ ဆွေးနွေးခဲ့ပါတယ်။

အမျိုးသားဒီမိုကရေစီအဖွဲ့ချုပ် (NLD) ကို နိုင်ငံရေးပါတီအဖြစ် တရားဝင် မှတ်ပုံပြန်တင်ရေးကိစ္စကို နိုင်ငံရေး ပါတီများ မှတ်ပုံတင်ခြင်းဥပဒေ ပြန်ထွက်လာပြီးမှပဲ NLD အနေနဲ့ ဆုံးဖြတ်မယ်လို့ ဆွေးနွေးပွဲအပြီးမှာ သတင်းထောက်တွေကို ဒေါ်အောင်ဆန်းစုကြည်က ပြောခဲ့ပါတယ်။
၂၀၁၀ ပြည့်နှစ်၊ ရွေးကောက်ပွဲမတိုင်ခင်က ပြဌာန်းခဲ့တဲ့ နိုင်ငံရေးပါတီများ မှတ်ပုံတင်ခြင်းဥပဒေကို အခု ပြန်ကျင်းပနေတဲ့ လွှတ်တော်အစည်းအဝေးတွေမှာ ပြန်ပြင်ဆင်ပြီးတော့ ဥပဒေကြမ်းအဖြစ် အတည်ပြုထား ပြီးပါပြီ။ သမ္မတ ဦးသိန်းစိန်က လက်မှတ်ထိုးပြီးတဲ့အခါမှာတော့ ဥပဒေဖြစ်လာမှာပါ။
တွေ့ဆုံပွဲပြီးတဲ့နောက် ပူးတွဲထုတ်ပြန်ချက်ထဲမှာတော့ အရင်က ဆွေးနွေးခဲ့မှုတွေအပေါ် အစိုးရဘက်က ကူညီ ဆောင်ရွက်နေတဲ့ အခြေအနေ၊ နိုင်ငံရဲ့ စီးပွားရေးဖွံ့ဖြိုးတိုးတက်စေဖို့ လွတ်လပ်စွာ ကုန်သွယ်ခွင့်၊ ကူးသန်းရောင်းဝယ် ခွင့် ရရှိရေးနဲ့ ငွေကြေးလည်ပတ်သုံးစွဲခွင့်ရရှိရေး စတာတွေရဲ့ အရေးကြီးမှုအပေါ် အမြင်ခြင်းဖလှယ်ခဲ့ကြတယ်လို့ ဒီသတင်းထုတ်ပြန်ချက်မှာ ဖော်ပြထားပါတယ်။
ဒါ့အပြင် တိုင်းရင်းသားလက်နက်ကိုင်အဖွဲ့အစည်းတွေနဲ့ ထာဝရငြိမ်းချမ်းရေးရရှိဖို့ အစိုးရရဲ့ ဆောင်ရွက်ချက်တွေနဲ့ တိုးတက်ဖြစ်ထွန်းမှု အခြေအနေတွေ၊ လွတ်ငြိမ်းချမ်းသာခွင့် ပေးသင့်သူတွေရဲ့ ကိစ္စတွေကိုလည်း ဆွေးနွေးခဲ့ကြတယ် လို့ ဒီသတင်း ထုတ်ပြန်ချက်မှာ ပါရှိပါတယ်။
နောက်ထပ်လည်း တွေ့ဆုံဆွေးနွေးမှုတွေကို ဆက်ပြီးပြုလုပ်သွားကြဖို့ သဘောတူခဲ့ကြောင်းလည်း မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်နဲ့ ၀န်ကြီး ဦးအောင်ကြည်တို့ရဲ့ ပူးတွဲသတင်းထုတ်ပြန်ချက်မှာ ရေးသားထားပါတယ်။ အရင် စစ်အစိုးရအချိန်အခါ၊ ဦးအောင်ကြည် ဆက်ဆံရေးဝန်ကြီး တာဝန်ယူချိန်က စပြီး ဒေါ်အောင်ဆန်းစုကြည်နဲ့ ဦးအောင်ကြည်တို့ ယခုအကြိမ်နဲ့ဆိုရင် ၁၃ ကြိမ် တွေ့ဆုံခဲ့ကြတာ ဖြစ်ပြီးတော့ အခု အစိုးရသစ်လက်ထက်မှာ လေးကြိမ်မြောက် တွေ့ဆုံဆွေးနွေးကြတာ ဖြစ်ပါတယ်။